Uff, berandu baina bai, komentatu behar dizuet gaur herrian kriston giroa dagoela Araba Euskaraz dela eta. Atzo guztia zegoen prest, guneak, komunak, zerbitzu desberdinak (kotxeak eta busak aparkatzeko landak, osasun zerbitzuak, txoznak) eta gaur herria jendez beterik esnatu zaigu. Eta eguzkiak lainoen artean izpiak botatzen. Giro ederra gaur herrian.

Arratsalderako eta gauerako musika, bertso-pilota, txotx afaria, etab…

Egitarau osoa:

9:00etan: Hainbat belaunalditako aguraindar euskaldunon ordezkaritza eta trikitilarien diana irtengo dira Euskal Herria plazatik. Aguraindar euskaldun goiztiar guztiak zaudete gonbidatuta!

9:10ean: Euskaldunon ordezkaritza hori izango da Aguraingo etxe zaharrenean euskararen lekukoa hartuko duena, eta bertan bi bertsolari gaztek kantatuko dute. Trikitilarien dianak kale nagusitik Donibane enparantzarainoko bidea egingo du.

9:25ean: Txalaparta Donibane enparantzan. Lope de Larrea ikastolako abesbatzak kantatuko du; ondoren euskaldunon ordezkaritzakoek bandoa irakurriko dute, zinta moztu eta egunari hasiera emango zaio. Gosari xumea goiztiar guztiontzat!

9:00etan: Egun honetarako Agurainen entzungo den eta esatari aguraindarrek egindako “Txindurri” euskarazko irratia emititzen hasiko da (Irratiko instalakuntzak Andra Mari enparantzan egongo dira)

10:00etan: “1842-2010: iraganean beltz,orain amets,bihar baietz” 168 km-ko Korrika-erronkari hasiera Donibane enparantzan. Lehenengo kilometroan aipatutako euskaldunon ordezkaritzak eramango du euskararen lekukoa .

DONIBANE ENPARANTZAN

10:30etatik-11ak arte: Euskal literaturaren jende aurreko irakurraldia.

10:45ean:”Oriamendin euskara freskue” ekimenaren hasiera. Puzzle erraldoia osatu baietz!

11:00etan: “Euskarari mezu biribilak” idazteko ekimena zabalduko da.

11:15ean: Pista jokoa herrian zehar (8-12 urte bitarteko neska-mutilentzat)

11:45ean: Jende aurreko euskal literaturaren irakurraldia.

12:15ean: Txontxongiloak.

12:30etatik-14:00etara: Euskararen fotomatoia. Atera ezazu zure argazkia!

12:40an: Gastronomia txokoa ( Musikaz lagunduta Elkarte Gastronomikoek bazkarirako prestatu duten menuaren azalpena)

12:50ean: Herri kirolak: euskararen erabileraren traktorea mugitu baietz! Egin apustu!

13:50ean: Argitxo, Porrero eta Sorginen agurra “Jo ta Fa”txarangak lagunduta

13:55ean: Dantzarien emanaldia eta Txulalai erraldoiaaaa dantzatuz…euskara ahorainooo eraman baietz!

14:25ean: Aguraingo musika-eskolako lagunen emanaldia

14:55ean: Herri-bazkaria Donibane enparantzan, elkarte gastronomikoek prestatuta.

15:45ean: Kantaldia. “Euskaraz abestuz, ilustratzen gara…”

16:45ean: Donibane Enparantzatik Andra Mari enparantzaraino kalejiran joango gara. Norberak bere musika tresna eramango du, munduko txoko desberdinetako tresnak, denok baikara musikari!

ANDRA MARI ENPARATZAN

17:00etan: Dantza-plaza

17:15ean: Mus-txapelketa azkarra Udaletxe ondoko plazan.

18:00etan: Herri kirolak: euskararen erabilerari ieuup….lastoa altxaxeari ieuupp… Euskararen aldeko lastoa altxatu baietz! Egin apustu!

18:15ean: Umeentzako euskaraz mintza jokoak.

19:00etan: Bertso-pilota (frontoi zaharrean edo ikastolako frontoian)

19:15ean: Txontxongiloak Andra Mari enparantzan

20:15ean: Futbolin bizirik txapelketa

20:50ean: Banako eta ”Txulalai erraldoia” dantzatuz, euskara ahoraaaaainoooooo!

21:00etan: Aguraingo musika taldeen euskal abestien bertsioak

22:00ean: Txotx, Txotx… sagardotegiaren irekiera!

22.45etan: Egunean zehar egindako argazkien proiekzioa afariarekin batera.

23:30etan: Aguraingo musikarien topaketa, “1842-2010: iraganean beltz, orain amets, bihar baietz” Korrika-erronka eta “Oriamendin euskara freskue”, ekimenen amaiera. Une horretan euskaraz, musikaz, ilusioz eta itxaropenez beteko dugu giroa! Jai giro honetan,

24:00etan “Iraganean beltz, orain amets, bihar baietz” lehenengo edizioari amaiera eman eta euskarak eta euskararen erabilerak urrats berriak eman ditzan bidea zabalduko dugu.

Hemen bloga irakur dezakezu eta hemen berria Euskaraba atarian.

Soziolinguistika Klusterrak antolatuta, otsailaren 26an, ostirala, gauzatuko da Donostiako Miramon Zientziaren Kutxagunean (Miramon Teknologia Parkean).

Jardunaldia hausnarketa teorikoan eta maila aplikatuan euskalgintzan ari direnei zuzentzen zaie, hau da, ikerlarien, unibertsitateko irakasleen, eta ikastetxeetan, lan munduan eta administrazioan euskararen normalkuntzan ari direnen topagune izatea du helburu. Horretarako, hitzaldi eta tailerrak burutuko ziren, eskura dauden datuak partekatuz, horien inguruan hausnartu eta eztabaidatzeko.

• Zergatik hitz egiten dute gazte horiek euskaraz? Eta beste horiek gaztelaniaz? Ez al dute gogorik? Ba al dakite?
• Plangintzetan aldaketak eragin nahi ditugunean, ba al dakigu non jarri gure ahaleginak? Ezagutza-mailako aurrerapenek, zein kasutan dakartzate erabilera-mailako aldaketak?
• Zerk bereizten ditu Nafarroako, Iparraldeko eta Gipuzkoa, Bizkaia eta Arabako hizkuntza-jarrerak?

Informazio guztia, prezioak, izena emateko formularioa etab. Soziolinguistika Klusterrak duen web gunean daukazu.

Zabaldu.com-en ikusita.

Umm, aspaldidanik idatzi gabe eta, gaur, inposatutako jaia izanik, aprobetxatzen dut gogoan ditudan web gune batzuen berri emateko. Soziolinguistika klusterraren web gune interesagarria da lehendabiizikoa, gizartea eta hizkuntzalaritza uztartzen duen proiektu nekaezina. “BAT” aldizkaria (artikulo batzuk, pena da aldizkari osoa ez izatea), txostenak, materiak ezberdinak, … Drupalekin kudeatutako atari hizkuntz-anitza.

Agurainen Egunkariaren alde antolatutako ospakisunen artean, bihar (hilaren 21an), Martxelo Otamendi eta Txema Auzmendirekin kafe-solasalditxo izateko aukera egongo da, Kale Nagusiko erakusketa gelan izango da 20:00etan. Atzo Egunkariaren aldeko jaia izan zen Santa Maria plazan, eguraldia ez genuen izan lagun, baina giro oso polita izan genuen.

48 izan dira Agurainen ospatutako ekitaldian Bai Euskarari Ziurtagiria eskuratu duten enpresa, saltoki eta era guztietako entitateak. “Bai Euskarari Ziurtagiria duten entitateek eman dituzten urratsak, ematen ari direnak eta emango dituztenak dira, euskararen eguzkia pizten eta bizitzen duten argia”, adierazi du Kontseiluko idazkari nagusi Xabier Mendigurenek.

Izan ere, urtez urte gora egiten du Bai Euskarari Ziurtagiriaren kopuruak. Azken 6 urteetan, 1.400 erakunde baino gehiago dira Euskal Herri osoan zehar ziurtagiria eskuratu dutenak. Agurainen bertan, ekitaldia ospatzen den hirugarren urtea da aurtengoa. Akordioa indartzen ari da, ditugun 48 ziurtagiriek frogatzen duten bezala. “gurain Araba osotik, biztanle proportzioa kontuan hartuta, ziurtagiri gehien dituen herria da”, azaldu du Mendigurenek. Ildo honetatik, Yolanda Arrondoren, Bai Euskarari Akordioko teknikariaren, lan bikaina azpimarratu dute gaurko ekitaldian.

Aipagarria da Kontseiluak eta Aguraingo udalak otsailean bertan lankidetza-hitzarmena berritu zutela. Orduan erabaki zen bezala, hiru hilabete hauetan udala eta Kontseilua aritu dira Bai Euskarari Akordioa kudeatzen. “Hemendik aurrera berriz, Aguraingo Udalak sustatutako Kultura Fundazioarekin batera egingo du lan Kontseiluak”, azaldu du udaleko ordezkari den Pello Iparragirrek.

Kontseiluak eman du berria.

• Astialdiko begirale ikastaroak
• Astialdiko zuzendari ikastaroa
• Gizarte eta kultur dinamizazioa
• Hezkidetzan aditua
• …

Ikastaro guztiak euskaraz ematen dira eta, aurten ere, Gasteizen eta Laudion egiteko aukera izango dugu.
Informazio gehiago, matrikulazio epeak, prezioak, etb Urtxintxa Eskolaren Webgunean

Kontseiluak Bai Euskarari Ziurtagiriaren banaketa egin die Aguraingo hainbat enpresa, saltoki eta era guztietako entitateri. Guztira, 49 enpresa, saltoki eta era guztietako entitatek jaso dute Bai Euskarari Ziurtagiria. “Aguraingo herritarrek egunerokoa euskalduntzeko ahalegina egin dute2, adierazi du Xabier Mendigurenek, Kontseiluko idazkari nagusiak.

Ekitaldi honetan Agurainen euskararen normalizazioa lortzeko konpromisoak hartu dituzten eragileek Bai Euskarari Ziurtagiria eskuratu dute. “Bai Euskarari Ziurtagiria jaso duten Aguraingo entitateak euskararen etorkizuna ziurtatzeko prozesuaren protagonista dira”, azpimarratu du Kontseiluko idazkari nagusiak. “Euskara bizitzako hainbat arlotan normaltasunez ikusi eta entzutea lortzen ari dira”. Kontseiluaren aburuz Bai Euskarari Ziurtagiriak balio beza konpromiso hori bideratu eta gizartearen aurrean harro azaltzeko.

Jarraipen Batzordeko ordezkariak gogorarazi du euskararen normalizazioa lortzeko ahalegina ez dela bakarka egiten eta Bai Euskarari Ziurtagiria ekimen kolektiboa dela. “Norberak, eragileak berak hartzen eta betetzen ditu konpromisoak, baina bide horretan elkarrekin ari gara denok”, azaldu du Jarraipen Batzordeko ordezkariak, Santiago Sasietak. Era berean, Jarraipen Batzordeko kidea den aldetik, Bai Euskarari Ziurtagiriaren bidetik jarraitzea animatu du Sasietak.

Begoña García, Bai Euskarari Ziurtagiria duen entitate bateko bozeramaileak, euskararen garapena gizarte osoaren erantzukizuna dela goraipatu du eta gizarte eragileen lana ere badela azaldu du, gizartean duten ezarpen garrantzitsuarengatik. “Oso pozgarria da Aguraingo gizarte eragileek euskarari bai esaten diogula ikustea”, adierazi du Begoña Garcíak.

Aguraingo Udaleko ordezkariak instituzioek euskararen normalizazio prozesuan duten garrantzia azpimarratu du. Bere ustez, udalek prozesu hau babestea ezinbestekoa da euskararen erabilera normalizatzeko. “Aguraingo Udalak ere, herritarrok euskararen alde egin duzuen apustuarekin bat egiten du eta gure konpromisoa berresten dugu”, adierazi du Aguraingo udaleko ordezkariak, Pello Iparragirrek.

Kontseiluak ere oso positiboan baloratu du ekimen hau. “Euskararen Gizarte Erakundeen Kontseilua osatzen dugunontzat horrelako egunak pozgarriak dira, duela sei urte abian jarri genuen Bai Euskarari Akordioa, garatzen ari dela eta fruituak ematen dituela ikusten dugulako”, bukatu du Kontseiluko idazkari nagusiak, Xabier Mendigurenek.

Jatorria: www.kontseilua.org