Janaririk gabe eta lo egiteko lekurik gabe, Aldundiaren menpeko “Harrera etxeetako” hezitzaileek furgonetetan eramaten dituzte bere ondasun eskasekin batera Udaletxearen Larrialdi Zerbitzuetara. Kasu askotan, azken hauek kalean uzten dituzte inolako etxebizitza edo gutxienez aldi baterako janaria izan dezaten alternatibarik eskaini gabe.

Izan ere egoera hau salatzen dugunok, gazte hauekiko Elkartasunerako Arabako Plataforma osatzen dugu, eta asteak daramatzagu behin-behineko neurri gisa gure etxeetan ostatua eskainiz eta gure poltsikoetatik dirua jartzen. Hau dena kalean lo egin behar ez dezaten eta jatekorik gabe egon ez daitezen.

Adingabearen Babes Juridikoari buruzko Lege Organikoak, bere hirugarren artikuluan, argi eta garbi zehazten ditu botere publikoen jarduerarentzako neurri zein printzipio gidariak. Lege honek oso argi uzten du 2.a. atalean administrazio eskudunen ardura dela, kasu honetan Arabako Foru Aldundiarena, gizarteratze ibilbide baten bidez jende honen integrazio soziala bermatzea. Ondorioz, foru erakunde honek gazteak zentro hauetatik kanporatuz erabateko txirotasunera kondenatzen dituenean, argi ikusten da adin nagusitasuna eskuratu ostean gazte hauek dituzten oinarrizko eskubideak bermatzeko legeak ematen dizkion arduren utzikeria gertatzen ari dela.

Gure ustetan politika honek helburu bakar batekin dator bat: adingabekoen harrera eskaera handitzen denean, aurretik gertatu izan den moduan, administrazioak arreta berezia behar duen biztanleria erabat gutxitzeko beharrezko neurriak ezartzen ditu. Nola ez, administrazioari bost axola zaio gazte hauen oinarrizko giza-eskubideekiko errespetua, ez eta zentro hauetan hezitzaile gisa diharduten arabarrak lan baldintza kaxkarretan aritzea edota ezer esan edo egin ahal izan gabe kaleratuak izatea.

Gaur Afrikatik pateran etorri zirenean bizirik ateratzea lortu zuten gazte hauek dira kale gorrian geratzen direnak, laguntza-zerbitzuetan lan egin ahal izateko ikasten aritu diren gure seme-alabekin batera. Bihar, ordea, zeintzuei tokatuko zaigu kalean lo egin eta karitate bidez jatekoa bilatu behar izatea? Badirudi egoera hauek gertatzea erraztu duten horiek “krisi ekonomikoaren” ondorioek ez dituela gehiegi kezkatzen, ez eta krisiak sortu duen kaos soziala ere. Honekin salatu nahi ditugun ondorioak oso larriak dira, euren legalitate bera ere zalantzan jartzen dutelako, eta horretaz gain, giza-eskubideen tratu duina ahalbidetzen dituzten nazioarteko akordioak zein haurtzaro eta gaztaro zaurgarrien babesa eta tratu txarren zein abandonatzearen debekuak urratzen dituztelako.

Horregatik guztiagatik, gizarte guztiari zein eskudunak diren erakunde guztiei, Arabako Foru Aldundia, Vitoria-Gasteizko Udaletxea, Arabako Adingabekoen Fiskaltza, Arartekoa, Sindikoa, Partidu politikoak, sindikatuak eta gainontzeko gizarte-eragile eskudunei deialdia luzatu nahi dizuegu: dokumentu honen bidez salatzen dugun larrialdi humanitario egoera eta antzekoak ekidin daitezen premiazko neurriak hartzeko deialdia, alegia.

Zentzu honetan, agiri publiko honekiko atxikimendua eskatu nahi dizuegu. Argibide dokumentu bat gehitzen dizuegu aurrekariak ulertu eta hemen salatzen dugunaren informazio gehiago topa dezazuen. Mesedez bidali zuen atxikimendua honako helbide honetara: jovenesapoyomutuo@gmail.com

DOKUMENTOA:GERTATUTAKOA

http://www.ikusbide.org/data/documentos/ATT00212.pdf

Bideoa: Adin txikiko atzerritarrak babesik gabe

http://www.elkarteak.info/noticias.php?c=berriak&a=ikusi&i=697&

Ostegun honetan Bilboko Hikaateneoan hitzaldi interesgarri bat egongo da. Bizkai Benetan Maitek antolatzen du.

Hemen Araban kezka batzuk baditugu naturaren aurkako erasoak direla eta…:

Olaztin Portland-ek errausketa egiteko baimena lortu du Nafarroako Gobernutik, eta kezka sortu du lautadan eta sakanan.

Patxi Lopezek EEBB-etan iragarri du Arabako lautadan “topatu” duten gasa aterako dutela “fracking” bezala ezagutzen den sistema eta teknologia erasokorra eta kutsagarriaren bidez. Ekologistak Martxan eta Lurra honen aurka azaldu dira.

Gasteizko Dato kalean topatu ditut musikari hauek euren trebezia erakusten.

Atzo Gasteizetik pasatu nintzen, bueltatxo bat ematen. Badaude guztiok ezagutzen ditugun jai-eremuak, txosna-gunea Unibertsitate kanpusean, Aihotz plaza, Foruen Plaza,…ugariak dira. Baina kaleetan ere musika, soinu, kolore, ahots ezberdinak entzuteko parada ere izango dugu. Bideoan Dato kalean grabatutako musikari ezberdinak dira, txalapartariak, bikote euskalduna eta musika-tresna bitxia jotzen zuen gizonezkoa.. guztiak bizitza bilatzen kaleetan, jendearengan harridura, poza,  irribarrea …sortuz. Gustuko ditut jaiak, kaleak eta soinuak.

Aurreko edizioetan bezala kalea okupatuko dugu arrozen inguruan kulturaniztasuna eta jaioterri ezberdinen arteko harremana aldarrikatzeko eguna. Aurten Eskoriaza Eskibel Enparantzan izango da, Gasteizko alde zaharrean. Gehiago jakin nahi baduzu edo zure koadrila, lankide, ikaskide edo bikotearekin arroza prestatu nahi baduzu, jarri harremanetan e-mail honetan gasteiz.mundukoarrozak@gmail.com edo webgunean dagoen kontaktu formularioa erabiliz: www.mundukoarrozak.info.

Badaramagu neska eta biok ia bi urte kontsumo talde batean Gasteizen eta oso pozik, egia esateko. Bere hastapenetan EHNEk bultzatu zuen Herrilur ekimenaren bidez eta poliki-poliki bere nortasuna finkatu du, gaur egun Nekasarea izenarekin ezagutzen da. Zer da proiektu hau? Ekoizlea (baserritarra) eta kontsumitzailea lotu, bitartekaririk gabe. Gu Laudioko Iñakirekin gaude; astero jasotzen dugu saskia hainbat produktuekin: fruta, ogia, barazkiak, gazta, oilaskoa, …

Bi urte hauetan zehar gure kontsumo ohiturak aldatu ditugu nabarmen,  gauza batzuk ez erosten, posible dugun neurrian denda txikietan erosten eta gure kontsumo ardatz nagusia Iñakiren saskia bihurtzen. Baditu 11 kontu nabarmentzekoak baina guretzat inportanteenak gertutasuna, kalitatea, prezioa eta konfiantza dira. Saskiaren produktuak zure beharretara egokitzen dira (guk txerrikiak kendu ditugu, gazta gehitu,…) momentuaren arabera eta hori bai, garaiko produktuak dira, lokalak eta ekoizpen ekologikoak.

Gasteizko taldean oso inportantea izan da El 70 tabernaren papera, bertan bildu, eztabaidatu, taldeak dinamizatu, …

Info gehiago duzue Baserri Bizia aldizkarian.

Consumoresponsable.info-k eman zidan bideoa eta artikuluaren berri.

Ordu erdiz deklaratu dute bi bertsolariek Auzitegi Nazionalean, eta libre utzi ditu.

Oihane Perea eta Josu Ormaetxea bertsolariek Auzitegi Nazionalean deklaratu dute gaur iaz Santiago egunean Gasteizen euskal presoen aldeko ekitaldi batean mikrofonoan presoen izena esateagatik. Ordu erdiz deklaratu dute, eta libre atera dira. Auzipetuta jarraitzen duten arren, epaileak ez du euren kontrako neurririk hartu.

Pereak eta Ormaetxeak deklaratu dutenez, Blusen eta Nesken batzordeak helarazi zizkien presoen izenak, eta horiek irakurri zituzten. Hala, fiskalak ere ez du neurririk hartu.

Epaileak ez ezik, fiskalak ere ez du badaezpadako neurririk eskatu.

Hainbat eragilek elkartasuna adierazi zien atzo bi bertsolariei epai bezperan, eta kezkatuta agertu ziren “egoera oso larria” delakoan.

Bertso bazkariak Gasteizko Udalaren oniritzia jaso zuen, baita Eusko Jaurlaritzako Herrizaingo Sailarena.

Berria.info-tik hartuta. EITB.com-en ere jasotzen dute.

Aguraingo hainbat proiektu sozialetan daukagu sartuta gure Ohiane baina bere bihotza, zalantzarik gabe, bertsolaritzan dago kokatuta. Errepresioaren azken urratsak bertsolaritza ere zigortzera eraman dezake.

Agiri honen bidez, bertsolari eta kultur eragile garen aldetik oso larritzat jotzen dugun gertaera baten salaketa irmoa egin nahi dugu.

2010eko uztailaren 25ean, Santiago egunean (Gasteizeko Andra Mari Zuriaren jaien testuinguruan) Blusa eta Nesken Batzordeak Euskal preso politikoen senideei elkartasuna adierazteko ekitaldia antolatu zuten, urtero bezala. Bertan Oihane Perea eta Josu Ormaetxea bertsolariek hartu zuten parte. Ekitaldian bertsotan egiteaz gain, presoen senideak oholtzara igo zitezen dei egiteko, zegozkien presoen izenak irakurri zituzten mikrofonoan. Ekitaldiak Gasteizko Udalaren eta Herrizaingo Sailaren baimena bazuen ere, Ertzaintza presente egon zen bertan, eta hiru lagun identifikatu zituzten.

Duela pare bat aste Oihane eta Josuri Audientzia Nazionaletik jakinarazpen bat iritsi zitzaien: urtarrilaren 14an 11:00etarako joan beharko dute Madrilera, deklaratzera. Uztailaren 25eko gertaerengatik terrorismoa goraipatzea egozten diete.

Nahiz eta zoritxarrez horrelako gauzetara ohituta egon, aurrez aipatutako guztiak badu berezitasun bat. Oihane eta Josu bertsolari bezala joan ziren ekitaldira, hau da, kultura-eragile bezala. Hortaz, bi bertsolariek, bertsolari bezala jarduteagatik eta beraien iritzia plazaratzeagatik errepresio-eraso bat jasan dutela adierazi nahi dugu. Eskubide funtsezkoenen urratze bat izateaz gain, bertsolaritzaren jardun askea oztopatzen duela iruditzen zaigu.

Guzti hau kontuan hartuta, gure kezka adierazi nahi dugu Oihane eta Josuren kasuaren aurrean, eta salaketa irmoa egin ere bai. Argi dago bertsolarien jardunari eta orokorrean bertsolaritzari egin zaion eraso bat dela, eta aurrekari arriskutsu bat ezartzen dela era honetan.

Salaketarekin batera, Oihane eta Josuri atxikimendua eta elkartasuna adierazi nahi diegu, agiri honen bidez.

Prentsa-aurrekoa:

Urtarrilak 13, osteguna, 11:00etan, Gasteizko Amaia Zentroan

Gasteizen, 2010eko urtarrilaren 10ean

OHARRA:

Josu eta Oihaneri Madrilera laguntzeko autobusa dago antolatuta.

Irteera:

• Aguraingo gasolindegian goizeko 5:30ean
• Gasteizko Iparralde Gizarte Etxean 6:00etan

Prezioa: 20 lagun bilduz gero bakoitzak 40 euro / 30 lagun bilduz gero bakoitzak 24 euro

Atzo Artisautza Feriatik pasatu nintzen, Probintzia Plazan, Foru Aldundiaren aurrean. 2o-ren bat artisau postu topa ditzakezu eta ikusgarrienetakoa Artefactoriakoa da, Granadatik etorritako beira artisau taldearena, hain zuzen. Goiko bideoan ikus dezakezue zer nolako produktuak dituzten salgai eta behekoan argazki batzuk dituzue. Pena merezi du handik pasatzea.

Bazen behin Gasteizen Txanotxu. Bazen bere ama, hirukoitz jardunaldiagatik ez zuena denbora ezertarako. Bazen Apirilaren 22a, Amalurraren eguna eta amonaren urtebetzea. Bazen Kaberna, publizitate faltsuko baso bat. Bazen kontsumoaren otsoa. Bazen amonaren jakintza. Bazen amonaren lagun eta aliatua. Bazen kooperatiba bat non elikadura subiranotasuna eta bidezko merkataritza Txanotxoren saskian bildu ziren.

Zuzendaria: Miriam del Río Sánchez

Marrazki bizidunen egillea: Jone Zugazaga

Iraupena: 20 m.

Creative Commons 3.0