Janaririk gabe eta lo egiteko lekurik gabe, Aldundiaren menpeko “Harrera etxeetako” hezitzaileek furgonetetan eramaten dituzte bere ondasun eskasekin batera Udaletxearen Larrialdi Zerbitzuetara. Kasu askotan, azken hauek kalean uzten dituzte inolako etxebizitza edo gutxienez aldi baterako janaria izan dezaten alternatibarik eskaini gabe.

Izan ere egoera hau salatzen dugunok, gazte hauekiko Elkartasunerako Arabako Plataforma osatzen dugu, eta asteak daramatzagu behin-behineko neurri gisa gure etxeetan ostatua eskainiz eta gure poltsikoetatik dirua jartzen. Hau dena kalean lo egin behar ez dezaten eta jatekorik gabe egon ez daitezen.

Adingabearen Babes Juridikoari buruzko Lege Organikoak, bere hirugarren artikuluan, argi eta garbi zehazten ditu botere publikoen jarduerarentzako neurri zein printzipio gidariak. Lege honek oso argi uzten du 2.a. atalean administrazio eskudunen ardura dela, kasu honetan Arabako Foru Aldundiarena, gizarteratze ibilbide baten bidez jende honen integrazio soziala bermatzea. Ondorioz, foru erakunde honek gazteak zentro hauetatik kanporatuz erabateko txirotasunera kondenatzen dituenean, argi ikusten da adin nagusitasuna eskuratu ostean gazte hauek dituzten oinarrizko eskubideak bermatzeko legeak ematen dizkion arduren utzikeria gertatzen ari dela.

Gure ustetan politika honek helburu bakar batekin dator bat: adingabekoen harrera eskaera handitzen denean, aurretik gertatu izan den moduan, administrazioak arreta berezia behar duen biztanleria erabat gutxitzeko beharrezko neurriak ezartzen ditu. Nola ez, administrazioari bost axola zaio gazte hauen oinarrizko giza-eskubideekiko errespetua, ez eta zentro hauetan hezitzaile gisa diharduten arabarrak lan baldintza kaxkarretan aritzea edota ezer esan edo egin ahal izan gabe kaleratuak izatea.

Gaur Afrikatik pateran etorri zirenean bizirik ateratzea lortu zuten gazte hauek dira kale gorrian geratzen direnak, laguntza-zerbitzuetan lan egin ahal izateko ikasten aritu diren gure seme-alabekin batera. Bihar, ordea, zeintzuei tokatuko zaigu kalean lo egin eta karitate bidez jatekoa bilatu behar izatea? Badirudi egoera hauek gertatzea erraztu duten horiek “krisi ekonomikoaren” ondorioek ez dituela gehiegi kezkatzen, ez eta krisiak sortu duen kaos soziala ere. Honekin salatu nahi ditugun ondorioak oso larriak dira, euren legalitate bera ere zalantzan jartzen dutelako, eta horretaz gain, giza-eskubideen tratu duina ahalbidetzen dituzten nazioarteko akordioak zein haurtzaro eta gaztaro zaurgarrien babesa eta tratu txarren zein abandonatzearen debekuak urratzen dituztelako.

Horregatik guztiagatik, gizarte guztiari zein eskudunak diren erakunde guztiei, Arabako Foru Aldundia, Vitoria-Gasteizko Udaletxea, Arabako Adingabekoen Fiskaltza, Arartekoa, Sindikoa, Partidu politikoak, sindikatuak eta gainontzeko gizarte-eragile eskudunei deialdia luzatu nahi dizuegu: dokumentu honen bidez salatzen dugun larrialdi humanitario egoera eta antzekoak ekidin daitezen premiazko neurriak hartzeko deialdia, alegia.

Zentzu honetan, agiri publiko honekiko atxikimendua eskatu nahi dizuegu. Argibide dokumentu bat gehitzen dizuegu aurrekariak ulertu eta hemen salatzen dugunaren informazio gehiago topa dezazuen. Mesedez bidali zuen atxikimendua honako helbide honetara: jovenesapoyomutuo@gmail.com

DOKUMENTOA:GERTATUTAKOA

http://www.ikusbide.org/data/documentos/ATT00212.pdf

Bideoa: Adin txikiko atzerritarrak babesik gabe

http://www.elkarteak.info/noticias.php?c=berriak&a=ikusi&i=697&

Arrosa Sarea duela ia hamar urte sortu zen. Euskal Herriko hainbat irrati txikiren arteko elkarlana, edo gaur egun hainbeste entzuten dugun auzolana, oinarri hartuta, sarea eraiki zen, eta 2002ko maiatzetik gaur artekoak lanean eman ditugu. Sarearen funtzio nagusia euskarazko irratsaioak elkartrukatzea izan da, orain artean. Hori dela medio, Donibane Garazin ekoitzitako musika irratsaio batek entzuleak ditu Iruñeko kaleetan, edo hasi berritan dabilen irrati batek programazio duin askoa egin dezake Gasteizen edo Urretxun egindako saioak erabilita.

Bada zerbait. Hala ere, sareko kideok beroni etekin handiagoa atera ahal geniola pentsatu izan dugu beti. Elkarlanean beste hainbat gauza ere egin ahal genituelakoan geunden. Irrati txikiok, gehienok ez-profesionalak gainera, eguneroko lanean agertu zaizkigun beharrei erantzuteko tresna propioak sortu behar izan ditugu. Horretara datoz jardunaldi hauek, hain zuzen ere: tresna hauek elkartrukatzera, bakoitzaren ezagutza besteekin konpartitzera. Hamar tailerretan hamar gairen inguruan lanean arituko gara. Oinarrizkoenetik, teknikoenera. Beti ere, kontu praktikoak. Honekin, hasi berri diren, edo hastear dauden, herri- edo auzo-irratiei dei berezia egin nahi diegu jardunaldiotara etortzeko. Ateak zabalik daude interesa daukan edonorentzat.

Lanotan goiz partea emango dugu, bazkaldu eta arratsaldeko saioari ekiteko. Arratsaldean pare bat gairen inguruan solasean arituko gara nagusiki, berauek landu dituztenen esperientzietan oinarrituta. Batetik generoa eta komunikabideak gaia hartuko dugu hizpide, eta bestetik irratiak eta teknologia berriak. Eguna gerturatu ahala esango dizuegu zein esperientziaren inguruan ariko garen, eta nortzuk izango ditugun gonbidatu.

Jardunaldiei amaiera emateko, denon arteko eztabaida saiotxo bat egingo dugu, Word Cafe moduan, eta nola ez, Euskal Herrian ezin da bestela eta, Gauerako kontzertu pare bat ere antolatu dugu.

Hau guztia Bergarako Gaztetxean izango da otsailaren 25ean, larunbata, goizeko 10:00etan hasita.

Informazio gehiago nahi izatera idatzi arrosa.sarea@gmail.com helbidera edo deitu 656 748 025 telefonora (Jon)

Prentsaurrekoa jarraian entzun dezakezu:

Arrosa Irrati Sarea www.arrosasarea.org

2011ko Abenduaren 29an, Bergarako Gaztetxean

Ostegun honetan Bilboko Hikaateneoan hitzaldi interesgarri bat egongo da. Bizkai Benetan Maitek antolatzen du.

Hemen Araban kezka batzuk baditugu naturaren aurkako erasoak direla eta…:

Olaztin Portland-ek errausketa egiteko baimena lortu du Nafarroako Gobernutik, eta kezka sortu du lautadan eta sakanan.

Patxi Lopezek EEBB-etan iragarri du Arabako lautadan “topatu” duten gasa aterako dutela “fracking” bezala ezagutzen den sistema eta teknologia erasokorra eta kutsagarriaren bidez. Ekologistak Martxan eta Lurra honen aurka azaldu dira.

Posta-e bidez jasota: Gaur asteazkena, hilaren 17a, arratsaldeko 19etan Palestinaren historia eta gaur egungo egoerari buruzko hitzaldi bat egongo da Aguraingo Herriko tabernan. Ali Mohammad Jadeh palestinarra etorriko da hitzaldia ematera eta oso interesgarria izango da.

Gasteizko Dato kalean topatu ditut musikari hauek euren trebezia erakusten.

Atzo Gasteizetik pasatu nintzen, bueltatxo bat ematen. Badaude guztiok ezagutzen ditugun jai-eremuak, txosna-gunea Unibertsitate kanpusean, Aihotz plaza, Foruen Plaza,…ugariak dira. Baina kaleetan ere musika, soinu, kolore, ahots ezberdinak entzuteko parada ere izango dugu. Bideoan Dato kalean grabatutako musikari ezberdinak dira, txalapartariak, bikote euskalduna eta musika-tresna bitxia jotzen zuen gizonezkoa.. guztiak bizitza bilatzen kaleetan, jendearengan harridura, poza,  irribarrea …sortuz. Gustuko ditut jaiak, kaleak eta soinuak.

Berri benetan kezkagarria. Datorren asteartean Aguraingo Udaletxeko Udalbatza aretoan egingo da hitzaldi informatiboa, ordua jakin bezain pronto jakinaraziko dizuet. Hona hemen posta-elektronikoz jasotako informazioa.

(Irudia hemendik hartu dut)

OLAZTIKO ERRAUSKAILUA. ZONALDE GUZTIRAKO ARRISKUTSUA

Iragan maiatzaren 26an Nafarroako Gobernuak Cementos Portland Valderrivas enpresak porlana ekoizteko zuen baimena aldatu zuen, orain hondakinak erretzeko jarduera berria bere Olaztiko lantegian martxan jartzea ahalbideratuz.

Hau hondakinen multinazionala eta enpresaren jabea den FCC-rentzat aurrerapauso garrantzitsua izan da, orain zonalde osoko biztanleen osasunaren bizkar etekin ekonomiko handiak lortuko baititu.

Errausketa hondakinak tratatzeko erarik arriskutsuena eta jasangaitzena da. Larriki kaltetzen ditu gizakion osasuna eta ingurumena eta bere eraginpeko eremuen baliabideak suntsitzen ditu. 33.000 mediku eta zientzialarik, Europako Parlamentuaren aurrean aurkeztu duten manifestuan hondakinen errausketak gizakion osasunerako, animaliendako, landareendako, ur eta airearendako dakartzan arriskuez ohartarazten dute.

Porlandegi-errauskailu batean hondakinak erraustea, dioxina eta furano hirugarren igortze iturri nagusia eta metal astun bigarren igortze iturri nagusia da, minbizi eragile nagusiak direnak eta zeinen aurrean ez dagoen esposizio babes maila segururik. Kutsatzaile hauek erraztasunez zabaltzen dira igorpen puntutik kilometro askora eta kontsumitzen ditugun produktu kutsatuen bidez (barazkiak, esnea, haragia, ura) gizakiongan pilatzen dira.

Hainbat nekazal enpresek hondakinak erretzean sortzen diren emisioen guneetatik 15 km-ko erradioan ekoizten diren produktuak erosteari uko egiten diote eta Europako zenbait estatutan eremu horietan elikagaiak ekoiztea eta merkaturatzea debekatu dute. Bertan gainera nekez iraungo dute bizirik nekazal-turismoko, ostalaritzako… beste jarduera batzuk.

Hauexek dira Portland enpresatik hainbat herritara dauden  distantziak:

Agurain: 15,92 Km

Zalduondo:12,31Km

Eulate:11,15Km

Asparrena: 10,44 Km

Ameskoa Baja: 9,15 Km

Etxarri Aranatz: 11,30 Km

Idiazabal : 15,22 Km

Zegama: 13,37 Km

Ataun: 13,88 Km

Errausketaren aurrean hondakinak tratatzeko alternatibak badira, hondakinak gutxitzean, berreskuratzean eta birziklatzean oinarritzen direnak. Atez ateko bilketa emaitza ikusgarriak lortzen ari da, errausketaren premia bertan behera utziz.

Datorren uztailaren 16an 19:30ean manifestazioa eginen da Altsasun (Netto-ko aparkalekutik abiatuta) Olaztiko porlandegian erraustea salatzeko.

Datorren asteartean, uztailak 12, Aguraingo Udalbatza Aretoan gai honi buruzko hitzaldi informatiboa izanen da.

Informazio gehiago:

http://www.gara.net/paperezkoa/20110209/247558/es/Temor-Altsasu-que-Portland-asuma-incineracion-residuos

http://bakaiku.info/index.php?option=com_content&view=article&id=114%3Aentrevista-sobre-la-incineradora-en-cementos-portland&catid=51%3Amedio-ambiente&Itemid=78&lang=es

http://www.noticiasdenavarra.com/2011/07/05/vecinos/sakana-leizaldea/el-pleno-rechaza-la-incineracion-de-residuos-en-cementos-portland

http://www.nabarralde.com/es/nabarmena/5775-no-a-la-incineracion-en-cementos-portland-de-olazti

http://olaztinerrausketarikez.blogspot.com/2011/02/temor-en-altsasu-que-portland-asuma-la.html

Datorren astean, ostegunean, ostiralean eta labunbatean, Ekainaren 30 eta uztailaren 1 eta 2an  jaialdi interkulturala ospatuko da Agurainen, Alai elkarteak antolatuta. Aurreko urteotan ez dut aukerarik izan parte hartzeko, baina aurten bai. Gainera ez du topo egiten Munduko Arrozen jaialdiarekin (aurreko urteetan ez bezala). Aukera polita izango da herriko jaioterri ezberdineko bizilagunekin egoteko, jai giroan.

Aurreko edizioetan bezala kalea okupatuko dugu arrozen inguruan kulturaniztasuna eta jaioterri ezberdinen arteko harremana aldarrikatzeko eguna. Aurten Eskoriaza Eskibel Enparantzan izango da, Gasteizko alde zaharrean. Gehiago jakin nahi baduzu edo zure koadrila, lankide, ikaskide edo bikotearekin arroza prestatu nahi baduzu, jarri harremanetan e-mail honetan gasteiz.mundukoarrozak@gmail.com edo webgunean dagoen kontaktu formularioa erabiliz: www.mundukoarrozak.info.