Sindikatuek ‘euskaraz bai’ adierazpenarekin bat egin dute

Autorea: Premine :-: Asteazkena, 2008ko Maiatzaren 21an, ordu honetan: 9:29 pm

Berri pozgarria benetan Kontseilutik jaso dudana, hori bai, galdera da CCOO eta UGT zer dela eta ez dutela sinatu. Agian Madrilen ez ote dute ondo ikusiko?. Esaten da denborak bakoitzari bere tokian jartzen diola…

Euskal Herriko hainbat sindikatuk ‘Euskaraz bai’ esango dute Kontseiluak bere 10. urteurrena ospatzeko prestatu duen prentsaurreko berezi batean. ‘Euskara Sustatzeko eta Euskalgintza Babesteko Akordio Soziopolitikoa’ sinatu duten sindikatuek ‘Euskaraz bai’ adierazpenarekin bat egin dute.

ELA, LAB, ESK, STEE-EILAS, ENHE eta HIRU sindikatuetako ordezkariek ‘euskaraz bai’ adierazpenari babesa eman diote Gasteizen egindako agerraldi batean. Hamaika eragilek sinatutako Akordio Soziopolitikoko sindikatu guztiak ‘Euskaraz bai’ adierazpenari atxiki zaizkio.

‘Euskaraz bai’ adierazpenak euskararen egoera azaltzeaz gain, etorkizunean jarraitu beharreko ildoak proposatzen ditu. “Euskarak etorkizuna behar duelako, iraungo duen hizkuntza izatea nahi dugulako eta euskal herritar guztien hizkuntza izatea nahi dugulako, ezinbestekoa da euskararen garapena ziurtatzea”, azaldu du Kontseiluko idazkari nagusia den Xabier Mendigurenek.

Hain zuzen ere etorkizunean jarraituko dituzten oinarrizko ildoen aipamena egin dute sindikatuetako ordezkariek:

1. Euskararen berreskurapen-prozesua azkartzea ezinbestekoa da. Hau da, egun Euskal Herrian euskara ez dakitenek ikastea, eta, bere erabilera esparru eta eremu berrietan handitzea, ahalik eta eperik laburrenean. Ezagutza eta erabilera zabaltzeko aukera berriak sortzen jarraitu behar dugu.
2. Funtzio sozial guztiak euskaraz garatzeko aukera lehenbailehen lortzea ezinbestekoa da, horrela lor baitaiteke euskararen normalizazioan urrats benetakoak egitea.
3. Euskara lehentasuneko hizkuntza izatea lortu behar da, horrela ziurta baitaiteke euskaldunen eta biztanle guztien hizkuntza-eskubideak bermatuta izatea.
4. Hori guztia egiteko lan politiko-instituzionala eta lan soziala bideratu behar dira, biak ere norabide berean. Erakunde instituzionalek, eragile politikoek, ekonomikoek eta sozialek, norbanakoek eta euskalgintzak norabide berean lan egitea ezinbestekoa da, guztion arteko lankidetzak ziurta baitezake euskararen geroa eta Euskal Herri euskalduna.

Euskararen Gizarte Erakundeek ‘euskaraz bai’ adierazpenaren atxikimendu kanpainaren hirugarren agerraldia egin dute. Lehendabizikoa Kontseiluko sortzaileekin egin zuten, bigarrena euskal kirolariekin. ‘Euskaraz bai’ adierazpenak gizarte-eragileen atxikimenduak biltzen jarraituko du. Hurrengo ekitaldi batean euskal kulturako hainbat ordezkariren atxikimendua eskatuko duela iragarri dute.

Era berean, edozein herritarrek atxikimendua emateko bidea azaldu dute; norbanakoen datuak Kontseiluko webgunean ematea besterik ez dago, hain zuzen ere www.kontseilua.org/euskarazbai helbidean. Jada asko dira bildutako atxikimenduak, “eskertzekoa da herritarren erantzun azkarra”, esan du Mendigurenek.

(Gehiago irakurri …)

Idatzi iruzkina

Atala: Euskara

Autorea

Kontxo, kuriosoa da, bizitza erdia Bizkaia maitean eman eta beste ia erdia Araban, eta gustora, gainera. Arabako lautadan, Agurainen zehatz mehatz, bizi den bizkaitar euskaldun eta euskaltzale, linux eta maczale eta, nola ez, nahiko parrandazale baten paranoiak izango dituzu hemen. Disfrutau.!!!!